ភ្នំពេញ៖ រដ្ឋាភិបាលកម្ពុជាបានសម្រេចបរិច្ចាគវិភាគទានជាទឹកប្រាក់ចំនួនមួយសែនដុល្លារអាមេរិក ជាជំនួយមនុស្សធម៌ដល់ប្រទេសតួកគី ដើម្បីជួយដល់កិច្ចខិតខំប្រឹងប្រែងជួយសង្គ្រោះពលរដ្ឋដែលរងគ្រោះដោយសារគ្រោះរញ្ជួយដីកាលពីដើមសប្តាហ៍នេះ។
បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៃកម្ពុជាចេញផ្សាយនៅថ្ងៃទី០៨ ខែកុម្ភៈ ឆ្នាំ២០២៣ រដ្ឋាភិបាលកម្ពុជាមានក្តីរន្ធត់ក្រោយពីទទួលបានដឹងអំពីសោកនាកម្មកើតឡើងនៅប្រទេសតួកគី ដោយសាររញ្ជួយដីក្នុងកម្រិត ៧,៨រ៉ិចទ័រ បាត់បង់មនុស្សរាប់ពាន់នាក់ ព្រមទាំងការខូចខាតយ៉ាងដំណំកាលពីថ្ងៃទី០៦ ខែកុម្ភៈ ឆ្នាំ២០២៣។
រដ្ឋាភិបាលកម្ពុជាសូមចូលរួមរំលែកទុក្ខយ៉ាងស្មោះស្ម័គ្រជូនចំពោះរដ្ឋាភិបាល និងប្រជាជនតួកគី ជាពិសេសក្រុមគ្រួសារនៃសព។ ជាមួយគ្នានេះ រាជរដ្ឋាភិបាលបានជូនពរឱ្យអ្នករងរបួសទាំងអស់ និងតំបន់នានាដែលរងផល ប៉ះពាល់ សូមឆាប់ជាសះស្បើយ និងត្រូវបានស្ដារឡើងវិញឆាប់រហ័ស។
គិតមកដល់ពេលនេះ គ្រោះរញ្ជួយដីបានសម្លាប់មនុស្សជិត ៨៤០០នាក់ក្នុងប្រទេសតួកគី និងប្រទេសស៊ីរី ដោយប្រទេសតួកគីមានមនុស្សចំនួន ៥ ៨៩៤នាក់បានស្លាប់ និង ២ ៤៧០នាក់បានស្លាប់ក្នុងប្រទេសស៊ីរី ខណៈមនុស្សរាប់សែននាក់ទៀតកំពុងតែជាប់គាំងនៅក្នុងអាគារដែលរលំដោយសារគ្រោះធម្មជាតិមួយនេះ។ អង្គការសុខភាពពិភពលោកប៉ាន់ស្មានថាអ្នកស្លាប់នឹងកើនឡើងដល់ ២ម៉ឺននាក់៕
